Um lóðarleigusamninga og landamerkjayfirlýsingu

Landeigandi hefur dregið að endurnýja lóðarleigusamninga á þeim forsendum að þeir þurfi að innihalda hnit lóðamarka, sem hann segist vera að afla. Liðnir eru 5 mánuðir frá því hann undirritaði skuldbindingu um að endurnýja alla lóðarleigusamninga á þessu ári, en ekkert bólar á umræddum hnitum, hvað þá samningunum sjálfum.

Nú er komið nýtt ferli um skráningu eignamarka með þinglýstri landamerkjayfirlýsingu fyrir hvert hverfi, sem gerir óþarft að tilgreina hnit í lóðarleigusamningum. Ekkert er því til fyrirstöðu að ganga frá lóðarleigusamningunum óháð landamerkjayfirlýsingu. Því hefur formaður skorað á landeiganda að hraða frágangi lóðarleigusamninga í samræmi við skuldbindingu, og boðið fram aðstoð við það, t.d. með því að afla undirritana félagsmanna.

Bréf sent landeiganda 2. október 2014:
Sæll Guðni, þú getur lesið um nýtt ferli fyrir staðfestingu eignamarka á þessari síðu: http://www.skra.is/fasteignaskra/skraning-landeigna/uppmaeling-landamerkja-og-stadfesting-eignamarka/ 
Eins og ég sagði í símann mæli ég með að þú leitir nánari leiðbeininga um frágang landamerkjayfirlýsingar hjá byggingarfulltrúa Borgarbyggðar. Ég er tilbúinn til að aðstoða við þá vinnu, sérstaklega með því að kynna félagsmönnum málið og afla undirritana þeirra á landamerkjayfirlýsinguna þegar þar að kemur, sem ég tel raunhæft með vorinu.
En hins vegar liggur mun meira á lóðarleigusamningunum. Eins og ég sagði þér í símann þá er óþarfi og í raun tvíverknaður að tilgreina hnit í lóðarleigusamningum, að ekki sé talað um hættuna á villum og ósamræmi. Eðlilegast er að lóðarleigusamningar vísi í gildandi deiliskipulag og þinglýst eignarmörk á hverjum tíma. Því er ekkert því til fyrirstöðu að endurnýja lóðarleigusamningana strax, óháð fyrrgreindri vinnu við landamerkjayfirlýsingu, enda vorum við vorum búnir að ná samkomulagi um texta samninganna þegar í vor.
Það er orðið mjög brýnt að endurnýja lóðarleigusamningana og því skora ég á þig að hraða frágangi þeirra í samræmi við skuldbindingu þína í samkomulagi frá í vor. Sem formaður félagsins býðst ég til að aðstoða við þá vinnu, t.d. með því að afla undirritana félagsmanna á samningana.
Með kveðju, Þorvarður

Framkvæmdir í september 2014

Austara vatnsbólið

Lokið er framkvæmdum samkvæmt myndum 2 og 3 í minnisblaði sérfræðings, tyrfa og girða umhverfis inntakstunnur og sá í öll sár.

 

Vestara vatnsbólið

Hluta af því sem lagt var til á myndum 5 og 6 í minnisblaði sérfræðings er lokið. Búið er að hylja báða tankana, grafa rás frá neðri inntakstunnu og taka tvær prufuholur við skriður í nágrenninu. Í ljós kom að neðri inntakstunnan er stífluð og eftir er að hreinsa mold frá henni og setja grús, um leið og hún verður hækkuð. Fylgst verður með prufuholunum í vetur.

  

Stjórnin

Minnisblað sérfræðings um vatnsbólin í Múlabyggð

Minnispunktar og myndir teknar saman af Þórólfi Hafstað og Hildi Ingvarsdóttur 26.8.2014

Minnismiðinn er settur saman í framhaldi af vettvangsferð í blíðviðri þann 22. ágúst 2014.  Á vatns­veitinni eru um 40 bústaðir. Vatn er fengið úr tveimur bólum og er dreifikerfið tvískipt. Því hefur lýst í samantekt stjórnar Félags bústaðaeigenda í Múlabyggð frá 5. febrúar 2014 „Staða vatnsveitu­mála í Múlabyggð“ og er alfarið vísað til hennar um staðhætti, rennslismælingar sem og almennt ástand veitunnar. Mynd 1 sýnir einungis yfirlit um afstöðu bóla og bústaða.

Mynd 1. Myndin sýnir þá bústaði eða lóðir, sem upp koma á vef Þjóðskrár Íslands (skra.is) eftir leitarorðinu“Múlabyggð“. Inn á myndina er laumað nokkurn veginn staðsetningu á vatnsbólunum.

Austara vatnsbólið

Mynd 2. Myndin á að sýna hvað gera þarf á yfirborði við austara vatnsbólið.

Mynd 3. Myndin sýnir nánar aðstæður í efra vatnsbólinu. Helstu viðgerðarþættir eru tilgreindir. Vakin er athygli á að verulegt vatnsmagn geymist í púkkinu kring um brunnana, sem er í lokuðu þrýstisambandi við miðlunartankinn þarna ögn neðar. Þegar púkkið tekur ekki lengur við rennur lækur frá svæðinu; nú ½ l/s.

Mynd 4. Myndin sýnir yfirlit um svolítið lindarrennsli austan við vatnsbólin (sjá „smá“ á mynd 1).

Vestara vatnsbólið

Mynd 5. Myndin sýnir toppa á tveimur samtengdum miðlunartönkum og yfirlit um hvað þarf að gera þar.

Mynd 6. Myndin sýnir afstöðu nýja tanksins á vestara svæði til svolítils lindarrennslis í grenndinni. Þarna er ekki mikils vatns von en ef eitthvað vatn fengist er þaðan sjálfrennandi að vestari veitunni.

Mynd 7. Myndin sýnir innrennsli í (gamla tankinn) á vesta vatnsbólssvæðinu föstudaginn 22. ágúst. Þetta er nú ekki merkileg buna og viðbúið að það verður að fá þarna meira vatn til að tryggt sé að þessi partur veitunnar verði ekki vatnslaus í þurrkatíð á sumrum eða þá eftir vetrarhörkur. Samt var ekki þurrkasumar!

Mynd 8. Myndin sýnir yfirlit um svolítið lindarrennsli vestan við vatnsbólin (sjá „smá“ á mynd 1).

Spottakorn vestan við vestara vatnsbólssvæðið er lindarvætla (mynd 8), sem er hartnær sambærileg og sýnd er á mynd  4. Þessari ´ærmigu´ verður ekki veitt sjálfrennandi í tank en stutt er frá henni er einn af vestustu bústöðunum og þangað mætti veita þessum smáleka inn á kerfið og dæla inná ef eitthvað er hér stöðugt rennsli.

Mælt er með að næstu aðgerðir verði gerðar í þrepum og þeim með svofelldum hætti:

1.      Bæta úr gerlamengunarhættu. Þær aðgerðir, sem hér hefur verið imprað á myndum, beinast að því að bæta vatnsgæðin en minna til að auka rennslið.

2.      Taka þarf afstöðu til næstu aðgerða til að auka fáanlegt vatn. Eftir að umbætur hafa verið gerðar til að tryggja heilnæmt vatn á austara svæði er inni í myndinni að tengja umfram­rennsli þaðan yfir á vestari veituna. Þarna var umframvatn að fá þegar skoðað var. Ekki er visst um sjálfrennsli þarna í milli en það talið líklegt.

3.      Þegar og ef enn meira vatns er þörf í þessari frístundabyggð er rétt að huga að róttækum breytingum á neysluvatnsöflun. Hingað til er vatnstaka einungis miðuð við misvel vatns­gefandi smálindir og sjálfrennsli frá þeim en kröfur bústaðaeigenda eru að geta alltaf gengið að rennandi gæðaneysluvatni.

4.      Virkja smálindir sitt hvoru megin núverandi vatnsbóla, leiða vatn að næsta bústað og dæla svolitlu vatni inn á dreifikerfin þegar á þarf að halda (þá samtengd til að nýta allt vatnið).

5.      Mögulegt er að gera sæmileg vatnsból í brunnum, sem grafa má í ármöl við bakka Stekksár og Urriðaár en, austan og vestan Múlabyggðar.  Báðar þessar ár eru í raun aumingjalegir og e.t.v. hverfulir lækir. Samt er við þá grunnvatnsvon en aðeins úr gröfnum dælubrunnum.

Framtíðarmúsíkin (sbr. lið 5)

Frekari möguleikar liggja fyrst og fremst í eyrum ánna tveggja; Stekksár og Urriðaár:

Mynd 9. Myndin sýnir afar grófan farveg Stekksár. Meðfram henni rennur grunnvatn í malareyrinni.

Mynd 10. Urriðaármölin er á köflum alls ekki ekki fínni og fallegri en Stekksármölin Víða er grunnt niður á fasta klöpp og þess vegna ekki alltaf á vísan að róa til að fá góðan filter fyrir neysluvatn.

Möguleg borun?  Á þessu svæði er talin vera lítil von til að borun í fast berg beri árangur. Ekki er hægt að búast við nema kannski hálfum sekúndulítra úr  100 metra djúpri holu. Kostnaður vegna borunar er sjálfsagt ekki undir 2 milljónum (bora og virkja). Slík hola getur hentað 2-3 bústöðum

Stjórn félagsins 2014-2015

Þorvarður Kári Ólafsson, formaður (nr.19)

Fanný Miiller Jóhannsdóttir, gjaldkeri (nr.4)
Guðrún Svanborg Hauksdóttir, ritari (nr.36)

Pétur Kristinsson (nr.17,18,20) 
Sigmundur Andrésson (nr.24)

Varamenn: Haraldur Jónsson (nr.13) og Hildur Ingvarsdóttir (nr.33,34).

Kosin á aðalfundi félagsins 29. apríl 2014.

Netfang stjórnar er mulabyggd@gmail.com

Lög félags bústaðaeigenda í Múlabyggð, eftir breytingar 2014

Samþykktir

fyrir félag bústaðaeigenda í Múlabyggð, Grímstöðum, Borgarbyggð

(eftir breytingar á aðalfundi 2014)

1. gr.

Heiti félags

Félagið heitir Félag bústaðaeigenda í Múlabyggð (skammstafað FBM).
Varnarþing þess er hjá Héraðsdómi Reykjavíkur.

2. gr.

Stofnun félags

Félagið var stofnaði í mars 1993 og starfar í samræmi við 17. gr. laga nr. 75/2008, um frístundabyggð og leigu lóðar undir frístundahús Félagssvæðið er Múlabyggð Grímstöðum, 301 Borgarbyggð.
Félagið er aðili að Landssambandi sumarhúsaeigenda fyrir hönd félagsmanna sinna.

3. gr.

Félagsmenn

Félagsmenn eru allir þeir sem hafa umráð yfir lóð undir frístundahús á svæðinu. Sama gildir um umráðamenn lóða án húss.
Eigendaskipti skal tilkynna stjórn félagsins.

4. gr.

Hlutverk

Hlutverk félagsins er:

1. Að gæta hagsmuna félagsmanna.
2. Að koma fram fyrir þeirra hönd gagvart leigusala.
3. Að hlutast til um að umgengni og framkvæmdir á svæðinu valdi sem minnstri röskun.
4. Að taka ákvarðanir um verkefni samkvæmt 19.gr. laga um frístundabyggð.

5. gr.

Sameiginlegar veitur

Ákveði aðalfundur að reka sameiginlega aðveitu eða fráveitu skulu gerðar skriflegar samþykktir um þann rekstur og honum haldið aðskildum frá almennum rekstri félagsins.

6. gr.

Skipun stjórnar

Stjórn félagsins skipa fimm (5) menn úr hópi félagsmanna sem kjörnir eru til eins árs í senn á aðalfundi. Formaður skal kjörinn sérstaklega en stjórnin skiptir að öðru leyti með sér verkum þannig að einn sé ritari, einn gjaldkeri og aðrir meðstjórnendur. Einnig skal kjósa einn/tvo varamann/menn.
Boða skal varamann til stjórnarfundar þegar aðalmaður boðar forföll eða þegar stjórnarmaður óskar þess.

7. gr.
Aðalfundur

Aðalfund skal halda árlega fyrir 1. júní. Fer hann með æðsta vald í málefnum félagsins.
Aðalfund skal stjórnin boða bréflega til tilgreindra umráðamanna frístundalóða með a.m.k. tveggja vikna fyrirvara. Boða má fund með tölvubréfi á það póstfang sem forráðamaður hefur látið stjórninni í té og telst það fullnægjandi svo fremi að ekki komi boð um það til sendanda að tölvubréfið hafi ekki komist til skila. Í fundarboði skal greina fundartíma, fundarstað og dagskrá. Þá skal geta þeirra mála sem ræða á og samantekt á efni þeirra tillagna sem leggja á fyrir fundinn.
Fundurinn telst lögmætur ef minnst þriðjungur félagsmanna sækir fundinn. Ef tilskilinn fjöldi félagsmanna mætir ekki á löglega boðaðan fund skal hann endurtekinn eftir skriflega boðun, með að lágmarki viku fyrirvara, og telst hann þá lögmætur með þeim fjölda félagsmanna, sem mæta seinna skiptið.
Dagskrá aðalfundar er sem hér segir:

1. skýrsla stjórnar um starfsemi félagsins,
2. staðfestur ársreikningur félagsins fyrir liðið reikningsár lagður fram til umræðu og samþykktar,
3. kosning formanns í samræmi við 6. gr.,
4. kosning annarra stjórnarmanna í samræmi við 6. gr.,
5. kosning varamanns/manna í samræmi við 6. gr.,
6. kosning skoðunarmanns/manna ársreikninga og varamanns,
7. framlagning rekstrar- og framkvæmdaáætlunar fyrir næsta ár,
8. ákvörðun um árgjald félagsins sem standa skal undir eðlilegu viðhaldi og rekstri skv. 15. gr.
9. mál sem tiltekin eru í fundarboði og afgreiðsla þeirra,
10. önnur mál

Hafi stjórn ekki boðað til aðalfundar 1. október er þeim félagsmönnum sem vilja halda fund heimilt að boða hann í samræmi við 1. mgr. og kjósa nýja stjórn sem telst réttkjörin í stað fyrri stjórnar.

8. gr.
Atkvæði

Eitt atkvæði fylgir hverri lóð undir frístundahús og fer tilgreindur umráðamaður með atkvæðisréttin. Afl atkvæða ræður úrslitum mála annarra en þeirra sem fjallað er um í 11. gr. og 19. gr.

9. gr.
Skipting kostnaðar og lögveð

Kostnaður skiptist að jöfnu og ræðst af fjölda lóða undir frístundahús á félagssvæðinu. Umráðamanni lóðar undir frístundahús er skylt að greiða sinn hluta kostnaðar sem hlýst af ákvörðun sem löglega hefur verið tekin.
Greiði félagsmaður ekki hlutdeild sína í sameiginlegum kostnaði og í félagssjóð á gjalddaga eignast félagið lögveð í eign hans á félagssvæðinu, þ.m.t. í leigulóðasamningi, til tryggingar kröfunni. Lögveðið nær einnig til vaxta og innheimtukostnaðar af kröfunni ef því er að skipta. Lögveðinu skal fylgja eftir með lögsókn eða því lýst við nauðungasölu innan árs frá stofnun þess. Viðurkenning eigenda utan réttar nægir ekki til að rjúfa fyrningu.

10. gr.
Fundarseta

Rétt til fundarsetu hafa félagsmenn, makar þeirra og sambúðaraðilar. Sambúðaraðili í skilningi samþykkta þessara er einstaklingur sem er í skráðri sambúð með leigutaka eða umráðamanni lóðar undir frístundahús, í frístundabyggð.
Félagsmaður má veita sérhverjum lögráða manni umboð til að mæta á fundi og greiða atkvæði. Skal umboðsmaður leggja fram á fundinum skriflegt og dagsett umboð. Slíkt umboð má hvenær sem er afturkalla.
Þegar tveir eða fleiri eru eigendur eða leigjendur að lóð skulu þeir tilkynna stjórn félagsins hver skuli teljast umráðmaður hennar samkvæmt samþykktum þessum og fer með atkvæðisrétt, fær fundarboð og kröfu um greiðslu gjalda til félagsins.

11. gr.
Sérstakar ákvarðanir

Ef lögð er fram tillaga á fundi félagsins samkvæmt auglýstri dagskrá í fundarboði um að ráðast í framkvæmdir eða stofna til kostnaðar sem leiða til útgjalda sem eru umfram venjulegan rekstrarkostnað félagsins skal sú tillaga talin samþykkt hljóti hún samþykki minnst 2/3 hluta greiddra atkvæða og minnst þriðjungur félagsmanna sækir fundinn.

12. gr.
Valdsvið stjórnar

Stjórn fer með æðsta vald í málefnum félagsins á milli aðalfunda. Stjórnin getur boðað til félagsfunda eins oft og þurfa þykir. Til funda skal boða bréflega með tveggja vikna fyrirvara á sama hátt og aðalfund.
Skylt er að boða til félagsfundar ef fjórðungur félagsmanna krefst þess skriflega
Stjórnin getur ekki bundið félagsmenn fjárhagslega.

13. gr.
Gerðarbók

Stjórn félagsins skal halda gerðarbók yfir bæði stjórnarfundi og félagsfundi
Í fundargerðarbók skal skrá yfirlit yfir allt það sem gerðist á félagsfundi og ákvarðanir hans. Fundargerðin skal undirrituð af ritara fundar og fundarstjóra. Fundargerðin er síðan full sönnun þess sem fram hefur farið á fundinum. Sama gildir með fundi stjórnarinnar.
Á fundum félagsins skulu allir félagsaðilar eða umboðsmenn þeirra sem sitja fundinn skrá nafn sitt í fundargerðabók eða fundarsóknarbók og fyrir hvaða lóð eða bústað þeir sitja fundinn.
Fundargerð hvers félagsfundar svo og samþykktan ársreikning og félagaskrá skal senda umráðamanni lóðar innan þriggja (3) vikna frá fundi á tölvupóstfang sem þeir láta stjórn félagsins í té. Aðrir félagsmenn (geta óskað eftir því að) fá gögnin send í pósti.
(Ath. ef félagið heldur úti heimasíðu eða gefur út fréttablað ætti að orða seinni mgr. í samræmi við það.)

14. gr.

Nefndarskipun

Stjórninni er heimilt að skipa nefndir til sérstakra verkefna ef henni þykir ástæða til.

15. gr.
Gjalddagi

Gjalddagi árgjalds skv. 6. gr. skal vera 1 mars og eindagi 15 dögum síðar. Gjalddagi framkvæmdagjalds sem ákvarðað er skv. 11. gr. skal vera tilgreint við samþykkt þess.

16. gr.
Reikningsárið

Reikningsár félagsins er almanaksárið.

17. gr.
Slit félagsins

Ef ekki er lengur tilgangur fyrir tilvist félagsins má slíta því með einföldum meirihluta og ákveður fundurinn ráðstöfun eigna sem félagið kann að eiga. Boða skal þá sérstaklega til fundarins vegna tillagna um niðurlagningu félagsins.

18. gr.
Þinglýsing samþykkta

Stjórn félagsins skal hlutast til um það að samþykktum þessum verði þinglýst á allar fasteignir og lóðasamninga og lóðir sem tilheyra félagssvæðinu svo og breytingum sem kunna að verða gerðar á samþykktum þessum.

19. gr.
Breytingar á samþykktum þessum

Breytingar á samþykktum þessum verða aðeins gerðar á aðalfundi með samþykki minnst 2/3 hluta greiddra atkvæða. Tillaga um breytingu verður einungis tekin til afgreiðslu að hún hafi verið kynnt í aðalfundarboði og minnst þriðjungur félagsmanna sæki fundinn.

Fundargerð aðalfundar í Félagi bústaðaeigenda í Múlabyggð haldinn hinn 29. apríl 2014

Formaður Þorvarður Kári Ólafsson setti fund kl. 20:20

Formaður var valinn fundarstjóri og Þorbjörn Jónsson fundarritari.

Lögmæti fundarins kannað. Bláir atkvæðaseðlar gildir við afgreiðslu á vatnsveitumáli. Alls 44 lóðarhafar í félaginu, 29 voru mættir sem þýddi að gera mátti lagabreytingar (þarf >50%) á fundinum.

Gengið var til dagskrár:

1. Skýrsla stjórnar kynnt af formanni. Sex fundir voru haldnir á starfsárinu. Einnig fundað með fulltrúum landeiganda og lögfræðingi Landsambands sumarhúsaeigenda.

Unnið að gerð samnings um vatnsveitumál. Ítarleg grein var gerð fyrir því á fundi í mars 2014. Mæting var þá ekki nægjanleg til afgreiðslu málsins. Stjórn beitti sér fyrir því að allir með útrunna lóðarsamninga geti gætu gert nýja samninga.

Skýrsla stjórnar samþykkt samhljóða.

2. Ársreikningur félagsins lagður fram af gjaldkera.

Reynt var að innheimta gömul árgjöld. Það tókst að innheimta 4 gjöld, annað var afskrifað. Rekstrarkostnaður félagsins jókst milli ára, aðallega vegna vatnsveitumálsins. Rekstur neikvæður um kr. 107.000,- á árinu 2013.

Ársreikningur var borinn upp og samþykktur samhljóða.

3. Kosning formanns.

Þorvarður Kári Ólafsson gaf einn kost á sér, og var hann því sjálfkjörinn.

4. Kosning annarra stjórnarmanna.

Allir úr fyrri stjórn gáfu kost á sér áfram nema Björn.

Fanný Jóhannsdóttir var kjörinn nýr gjaldkeri.

Hildur og Haraldur valin í varastjórn.

5. Kosning varamanna.

Endurkjörnir frá fyrra ári.

6. Kosning skoðunarmanna ársreikninga og varamanns.

Endurkjörnir frá fyrra ári.

7. Rekstraráætlun.

Það má búast við auknum rekstarkostnaði vegna vega, girðinga og vatnsveitu. Enginn töluleg áætlun var lögð fram.

8. Árgjald.

Formaður lagði til óbreytt árgjald kr. 7.500,-.Samþykkt samhljóða.

9. Mál tiltekin í fundargerð:
   1. Kynning á ástandi vatnsveitu, vega og girðinga. Hildur gerði grein fyrir ástandi vatnsveitumála á greinargóðan og myndrænan hátt. Vatnsveitan hefur ekki starfsleyfi, heilbrigðiseftirlitið hefur gert ítrekaðar athugasemdir við vatnsveituna. Staða mála óbreytt frá árinu 2010. Haraldur kynnti þær framkvæmdir í vatnsveitumálum sem farið hafði verið í og leggja þarf í. Fór síðan yfir ástand vega- og girðingamála. Fjörug umræða um vatnsveitumálin að framsögu Hildar og Haraldar lokinni. Einkum var rætt um óvissu við kostað ef vatnsveitan yrði yfirtekin af bústaðaeigendum og leigjendum.

2. Kynning á nýjum lóðarleigusamningum. Formaður kynnti einstaka liði nýs samnings. Ný lóðarleiga verður kr. 27.500,- lægri en eldri leiga. Allir lóðarhafar munu eiga kost á að ganga inn í nýjan leigusamning til 20 ára.

3. Lagabreytingar kynntar af formanni. Umræður:

1. 4.grein laganna fjallar um hlutverk félagsins. Lagt var til að síðasti liður hennar (sem í eldri lögum fjallaði um samskipta- og umgengnisreglur) hljóði svo:

4. Að taka ákvarðanir um verkefni samkvæmt 19.gr. laga um frístundabyggð.

Samþykkt samhljóða.

2. Lagt var til að 5.grein laganna (sem í eldri lögum fjallaði um tilgang félagsins) hljóði svo:

5.gr Sameiginlegar veiturÁkveði aðalfundur að reka sameiginlega aðveitu eða fráveitu skulu gerðar skriflegar samþykktir um þann rekstur og honum haldið aðskildum frá almennum rekstri félagsins.

Samþykkt samhljóða

3. Lagt er til að 19.grein laganna (sem áður kvað á um helmings fundarsókn til lagabreytinga) hljóði svo:

Breytingar á samþykktum þessum verða aðeins gerðar á aðalfundi með samþykki minnst 2/3 hluta greiddra atkvæða. Tillaga um breytingu verður einungis tekin til afgreiðslu að hún hafi verið kynnt í aðalfundarboði og minnst þriðjungur félagsmanna sæki fundinn.

Samþykkt með öllum greiddum atkvæðum gegn einu.

4. Staðfesting á samningi um yfirtöku á reksti vatnsveitu, vega og girðinga. Formaður kynnti breytingar á samningsatriðum frá seinasta fundi. Um var að ræða nokkrar orðalagsbreytingar og að öllum byðist að gera nýjan samning. Spurningum fundarmanna var svarað af stjórninni.Samningurinn var samþykktur samhljóða.

5. Vatnsveitusamþykktir. Formaður fór í gegnum tillögur að samþykkt fyrir vatnsveitudeild félagsins, alls 7 greinar. Borið upp til samþykktar og samþykkt samhljóða.

6. Gjaldskrá fyrir vatnsveitu Múlabyggðar. Lagt til að árgjaldið yrði kr. 55.000,- per lóð fyrir árið 2014 og stofngjaldið kr. 300.000,-. Stjórn áætlar að árgjald þurfi að vera tvöfalt eldra vatnsveitugjaldi í um það bil 2 ár. Lagt var til að lóðum nr. 17, 20, 28, 32, 33 gefist kostur á vera með í vatnsveitunni frá upphafi gegn greiðslu árgjalds, en án þess að greiða sérstakt stofngjald, og var það samþykkt samhljóða.Gjaldskrá samþykkt samhljóða

10. Önnur mál
    1. Spurt um rétt Guðna Haraldssonar til þess að byggja á nýjum lóðum. Formaður og stjórnarmenn svöruðu fyrirspurnum.

2. Sjónvarpsmál. Útsendingum á eldra formi (analog) hefur verið hætt. Athygli vakin á að menn þurfa nú stafrænan móttakara til að ná útsendingu.

Fleira ekki gert og fundi slitið kl. 22:30

Um hreinsun rotþróa í Múlabyggð

Sveitarfélagið Borgarbyggð sér um að hreinsa seyru úr rotþróm samkvæmt gildandi reglum hverju sinni. Síðasta tæming var gerð í júlí 2012.

Eigendur geta fylgst með hreinsun við sín hús með því að skrá sig inn gegnum þessa síðu: http://borgarbyggd.is/pages/box-a-forsidu/thjonusta-vid-ibua/rotthroakortid/

Eigendur sumarhúsa verða að tryggja góðan aðgang að rotþró til tæmingar og merkja losunarop þannig að auðvelt sé að finna það.

Upplýsingar um tæmingu rotþróa frá Umhverfisstofnun.

Reglugerð um meðhöndlun seyru.

Tæming og flutningur.
14. gr.
14.1 Sveitarstjórnir skulu sjá til þess að komið sé á kerfisbundinni tæmingu á seyru úr rotþróm.
14.2 Rekstraraðilar húsnæðis eða svæða þar sem salernisúrgangur, ristarúrgangur eða seyra fellur til bera ábyrgð á allri meðferð og flutningi úrgangsins, svo fremi ekki sé í gildi sérstök heilbrigðissamþykkt sem kveður á um annað.

Lög um hollustuhætti og mengunarvarnir

Vatn í Múlabyggð ekki drykkjarhæft

Áríðandi orðsending til húseigenda, íbúa og gesta í Múlabyggð:
Félag bústaðaeigenda í Múlabyggð hefur tekið yfir vatnsveitu staðarins með samningi við Guðna Haraldsson, eiganda Grímsstaða, sem samþykktur var á aðalfundi félagsins í apríl sl.
Stjórn FBM hefur þegar hafist handa við úrbætur við vatnsveituna sem miðast við að hún fái starfsleyfi og þar með heilbrigðisvottun, svo og að tryggja næga vatnsöflun.
Þar til að annað verður tilkynnt er bústaðaeigendum, að viðlagðri ábyrgð þeirra, bent á að vatn úr vatnsveitunni er ekki drykkjarhæft og þeim bent á að hengja upp með áberandi hætti í bústöðum sínum orðsendingu þess efnis öllum til viðvörunar.
f.h. stjórnar,
Þorvarður Kári Ólafsson, formaður

Bústaðaeigendur í Múlabyggð staðfesta yfirtöku á rekstri vatnsveitu, vega og girðinga

Á aðalfundi Félags bústaðaeigenda í Múlabyggð 29. apríl 2014 staðfesti félagið einróma samning við landeiganda um að félagið yfirtaki rekstur vatnsveitu, vega og girðinga í sumarhúsahverfinu. Jafnframt var lögum félagsins breytt þannig að þessi rekstur væri heimill. Gerðar voru sérstakar vatnsveitusamþykktir og samþykkt gjaldskrá fyrir vatnsveituna. Allir þeir sem eru tengdir vatnsveitunni í dag teljast aðilar að vatnsveitudeild félagsins og einnig gefst nokkrum óbyggðum lóðum til viðbótar kostur á að vera með í deildinni frá upphafi. Framundan eru brýnar umbætur til að tryggja heilnæmi vatnsins og skilvirkni veitunnar. Nánari upplýsingar er að finna í gögnum fundarins á vefnum mulabyggd.blogspot.com. Staðfestur samningur fer hér á eftir:

Umboð vegna aðalfundar 2014

Þeir sem ekki geta mætt á aðalfundinn 29. apríl eru hvattir til að nota meðfylgjandi eyðublað til að veita öðrum umboð.

Sérð þú sjónvarpsútsendingu RÚV í sumarhúsinu þínu?

Frétt af sumarhus.is:
RÚV hefur nú hafið stafrænar útsendingar. Við það aukast myndgæðin til muna.

Fyrir árslok 2014 var tveimur sjónvarpsrásum RÚV dreift stafrænt til a.m.k. 99,8% landsmanna, annarri í háskerpu (HD) en hinni í hefðbundnum stafrænum myndgæðum (SD).

Samhliða uppbyggingu nýja kerfisins hefur eldra dreifikerfi RÚV verið lagt niður, enda er það tæknilega úrelt.

31. mars 2014 var útsendingum um gamla dreifikerfið hætt.

---

Ef sjónvarpið er tengt við myndlykil, nærð þú stafrænni útsendingu án fyrirhafnar.

En ef þú ert ekki með myndlykil og hefur notað loftnet, þarf að kanna tvennt:

1. Er stafrænn móttakari í sjónvarpstækinu?

Sé stafrænn móttakari til staðar þarf að láta sjónvarpstækið leita að stafrænu útsendingunni. Stafrænn móttakari er í mörgum nýrri tækjum og geta söluaðilar sjónvarpstækja veitt upplýsingar um hvort svo sé.

Sé stafrænn móttakari ekki í sjónvarpstækinu þarf að kaupa hann hjá söluaðilum eða leigja hjá Vodafone.

2. Þarf að skipta um loftnet og/eða breyta stefnu þess?

Ef þú nærð ekki stafrænu útsendingunni með núverandi loftneti þarftu mögulega að skipta um loftnet eða breyta stefnu þess.

Fundarboð - Aðalfundur Félags bústaðaeigenda í Múlabyggð 29. apríl 2014

Aðalfundur Félags sumarhúsaeigenda í Múlabyggð verður haldinn þriðjudaginn 29. apríl næstkomandi, kl 20.00.

Fundarstaðurinn er að Stórhöfða 31, sal Rafiðnaðarsambandsins (gengið inn að neðanverðu við húsið)

Fundarefni er skv. lögum félagsins:

1. Skýrsla stjórnar um starfsemi félagsins,

2. Staðfestur ársreikningur félagsins fyrir liðið reikningsár lagður fram til umræðu og samþykktar,

3. Kosning formanns í samræmi við 6. gr.,

4. Kosning annarra stjórnarmanna í samræmi við 6. gr.,

5. Kosning varamanns/manna í samræmi við 6. gr.,

6. Kosning skoðunarmanns/manna ársreikninga og varamanns,

7. Framlagning rekstrar- og framkvæmdaáætlunar fyrir næsta ár,

8. Ákvörðun um árgjald félagsins sem standa skal undir eðlilegu viðhaldi og rekstri skv. 15. gr.

9. Mál sem tiltekin eru í fundarboði og afgreiðsla þeirra,

10. Önnur mál

Undir lið 9 verður tekið fyrir eftirfarandi:

a) Kynning á ástandi vatnsveitu, vega og girðinga.

b) Kynning á nýjum lóðarleigusamningum.

c) Lagabreytingar

d) Staðfesting á samningi um yfirtöku á reksti vatnsveitu, vega oggirðinga

e) Vatnsveitusamþykktir

f) Gjaldskrá vatnsveitu

Mikilvægt er að félagsmenn kynni sér meðfylgjandi gögn vel og fjölmenni á fundinn því um stór mál er að ræða og nauðsynlegt samkvæmt lögum að meiri hluti félagsmanna mæti til að hægt sé að afgreiða þau. Þeir sem ekki geta mætt eru hvattir til að nota meðfylgjandi eyðublað til að veita öðrum umboð.

Gögn fundarins er að finna á vef félagsins http://mulabyggd.blogspot.com

Fyrir hönd stjórnar,

Þorvarður Kári Ólafsson formaður 

Samningur um yfirtöku á rekstri vatnsveitu, vega og girðinga, til staðfestingar á aðalfundi 2014

Þessi samningur var undirritaður 11.apríl 2014 og er lagður fyrir aðalfund Félags bústaðaeigenda í Múlabyggð 29. apríl 2014 til staðfestingar:

 

 

 

 

Tillaga stjórnar að lagabreytingu á aðalfundi 29. apríl 2014

I. 4.grein laganna fjallar um hlutverk félagsins. Lagt er til að síðasti liður hennar (sem í eldri lögum fjallar um samskipta- og umgengnisreglur) hljóði svo:

4. Að taka ákvarðanir um verkefni samkvæmt 19.gr. laga um frístundabyggð.

II. Lagt er til að 5.grein laganna (sem í eldri lögum fjallar um tilgang félagsins) hljóði svo:

5.gr Sameiginlegar veitur

Ákveði aðalfundur að reka sameiginlega aðveitu eða fráveitu skulu gerðar skriflegar samþykktir um þann rekstur og honum haldið aðskildum frá almennum rekstri félagsins.

III. Lagt er til að 19.grein laganna (sem áður kvað á um helmings fundarsókn til lagabreytinga) hljóði svo:

Breytingar á samþykktum þessum verða aðeins gerðar á aðalfundi með samþykki minnst 2/3 hluta greiddra atkvæða. Tillaga um breytingu verður einungis tekin til afgreiðslu að hún hafi verið kynnt í aðalfundarboði og minnst þriðjungur félagsmanna sæki fundinn.

Rök fyrir lagabreytingunum:

Megintilgangur þessara breytinga er að í lögunum sé skýr heimild til þess að félagið megi reka vatnsveitu og sjá um viðhald vega og girðinga. Til að raska ekki númerum lagagreina eru tekin út óþarfa ákvæði, sem eru innifalin í öðrum ákvæðum og lögum um frístundabyggð. Jafnframt eru ekki lengur gerðar kröfur um helmings mætingu á aðalfund til að breyta lögum félagsins, en áfram er gerð krafa um aukinn meirihluta fundarins til að gera lagabreytingu.

Núgildandi lög félagins: http://mulabyggd.blogspot.com/2009/11/tillaga-nyjum-logum-fyrir-felag.html

Lög um frístundabyggð: http://www.althingi.is/altext/stjt/2008.075.html

Stjórn félagsins

Tillaga að gjaldskrá fyrir vatnsveitu Múlabyggðar

Tillaga lögð fyrir aðalfund 2014

Árgjald lóðar	55.000 krónur
Stofngjald	300.000 krónur	(vatnsöflunargjald og tengibúnaður á lóðamörkum, miðað við að aðallögn sé til staðar við lóðarmörk)

Rök fyrir árgjaldi: Gjaldið samsvarar tvöfaldri lækkun lóðarleigunnar samkvæmt yfirtökusamningi 11.apríl 2014. Þetta er sú upphæð sem stjórn telur nauðsynlega vegna brýnna verkefna til að vatnsveitan uppfylli lagakröfur. Stefnt er að lækkun þessa gjalds þegar lagakröfur hafa verið uppfylltar.

Rök fyrir stofngjaldi: Stofngjald þarf að mæta kostnaði við að afla meira vatns og efla stofnlagnir vegna nýrra notenda, ef þeir koma til. Gert er ráð fyrir að aðallögn sé til staðar við lóðarmörk, en ef svo er ekki þurfa nýir notendur jafnframt að bera kostnað af að leggja aðallögn þangað.

Tillaga að samþykktum fyrir vatnsveitudeild Félags bústaðaeigenda Múlabyggð

Tillaga lögð fyrir aðalfiund 2014

1. grein Staða

Deildin starfar samkvæmt heimild í 4. og 5. grein laga félagsins og samningi við landeiganda dags. 11. apríl 2014.

2. grein Aðild

Aðilar að deildinni eru þeir félagsmenn sem eru lóðarhafar þeirra lóða sem vatns njóta frá sameiginlegri vatnsveitu við stofnun deildarinnar.

Félagsmenn í deildinni öðlast með þessu hlut í mannvirkjum og öðrum eignum deildarinnar. Sá hlutur flyst frá seljanda eignar til kaupanda við eigendaskipti á landi og/eða húsi samkvæmt fasteignaskrá.

Lóðarhafar annarra lóða á svæði félagsins en tilgreindar eru í 1. mgr. geta orðið aðilar að deildinni með því að greiða stofngjald samkvæmt gjaldskrá deildarinnar. Umsóknir um tengingu skal senda skriflega til stjórnar félagsins.

3. grein Hlutverk

Hlutverk deildarinnar er að annast rekstur sameiginlegrar vatnsveitu fyrir frístundabyggðina í Múlabyggð samkvæmt samningi félagsins við landeiganda.

Í því felst m.a. að standa fyrir fullnaðar frágangi lagna, sameiginlegu viðhaldi, stækkun ef þurfa þykir, endurbótum á frágangi vatnsbóls, eftirliti með gæðum vatnsins, tæmingu lagna og áhleypingu eftir þörfum.

4. grein Fjármál og ákvarðanir

Rekstri vatnsveitunnar skal haldið aðskildum frá almennum rekstri félagsins. Reikningar hennar skulu lagðir fram með reikningum félagsins á aðalfundi þess. Aðalfundur félagsins hefur æðsta vald í málefnum deildarinnar, en þó þannig að einungis félagsmenn í deildinni hafa atvæðisrétt með eitt atkvæði fyrir hverja lóð sem er í deildinni. Einnig er stjórn félagsins heimilt að boða sérstaka deildarfundi um málefni vatnsveitunnar.

5. grein Skyldur og heimildir

Skráður eigandi sumarbústaðar eða lóðarhafi, sem fengið hefur tengingu við vatnsveituna samkvæmt 2.grein hér að framan, ber ábyrgð á greiðslu vatnsgjalds og annars kostnaðar samkvæmt 3. grein, sem réttilega hefur verið ákveðinn samkvæmt samþykktum þessum á löglega boðuðum fundi samkvæmt 4. grein hér að framan. Heimilt er að loka fyrir heimæð hjá þeim, sem vanrækja að greiða fyrrnefnd gjöld á gjalddaga, að undangenginni skriflegri aðvörun.

Einnig er heimilt að loka fyrir heimæð hjá þeim, sem sannanlega eyða vatni óhóflega, að undangenginni skriflegri aðvörun.

Heimilt er að loka fyrir heimæð án fyrirvara ef nauðsyn krefur vegna viðgerða á aðallögnum eða tenginga annarra heimæða.

Að öðru leyti gilda ákvæði laga og reglugerða um vatnsveitur sveitarfélaga á hverjum tíma um vatnsveitu þessa eftir því, sem við getur átt, sbr. núgildandi lög nr. 32/2004 og reglugerð nr. 401/2005.

6. grein Breytingar á samþykktum þessum

Breytingar á samþykktum þessum verða aðeins gerðar á aðalfundi með samþykki minnst 2/3 hluta greiddra atkvæða. Tillaga um breytingu verður einungis tekin til afgreiðslu að hún hafi verið kynnt í aðalfundarboði og minnst þriðjungur félagsmanna sæki fundinn.

7. grein Slit

Hætti deildin stöfum skal lögmætur aðalfundur félagsins, sem slítur deildinni, taka ákvörðun um ráðstöfun á eignum hennar, enda skal þess sérstaklega getið í fundarboði. Einungis félagsmenn í deildinni hafa atkvæðisrétt við slíka ákvörðun.

Nýr lóðarleigusamningur sem öllum leigutökum í Múlabyggð býðst á árinu 2014

LÓÐARLEIGUSAMNINGUR

___________________________________________________________________________

Leigusali:

Guðni Haraldsson,  kt. 310146-2829,

Grímsstöðum, Borgarbyggð.

Leigutaki/leigutakar:

_________________________________________  kt. ______________________

_________________________________________  kt. ______________________

heimili ____________________________________________________________

Lóð:

Lóðin heitir _______________________________ landnúmer _________________

stærð _______________

Aðilar gera hér með lóðarleigusamning um ofangreinda lóð undir sumarbústað úr landi jarðarinnar Grímsstaða, Borgarbyggð, samkvæmt staðfestu og þinglýstu deiliskipulagi fyrir frístundabyggð á jörðinni.

Deiliskipulag ásamt byggingar- og skipulagsskilmálum fyrir svæðið telst hluti af samningi þessum.  Leigutakar hafa kynnt sér deiliskipulagið og skilmálana og samþykkja það að öllu leyti.

Leiguskilmálar:

1.               Leigusali leigir leigutaka á leigu land undir eitt sumarhús á ofangreindri lóð úr jörðinni Grímsstöðum, Borgarbyggð.  Mannvirki og notkun lóðarinnar skulu vera í samræmi við skipulagsskilmála.  Leiguafnot skv. samningi þessum eru land skv. fyrrtöldu, akvegir og opin svæði innan orlofshúsasvæðisins eftir samkomulagi við leigusala.

2.               Leigutími er 20 ár frá dagsetningu samnings þessa.  Um framlengingu samningsins að loknum leigutíma fer samkvæmt gildandi lögum á hverjum tíma eða samkomulagi aðila.

3.               Ársleiga er  krónur 50.000 -fimmtíuþúsund  og skal hún greidd í maí ár hvert skv. greiðsluseðli (má vera rafrænn) sem landeigandi sendir leigutaka.  Leigugjald breytist til samræmis við breytingu á byggingarvísitölu milli gjalddaga ár hvert.  Grunnleiga samnings þessa er miðuð byggingarvísitölu í mars 2014 eða 118,9 stig (grunnur frá 2010).  Sé leigan ekki greidd fyrir eindaga (mánuði eftir gjalddaga) falla á hana hæstu lögleyfðir dráttarvextir og innheimtukostnaður komi til lögfræðilegrar innheimtu.

                  Verði leigusamningur endurnýjaður í lok leigutíma skal leigufjárhæð í nýjum leigusamningi miðuð við eldri leigu eins og hún hefur breyst með verðtryggingu.

                 

4.               Í leigugjaldi er innifalið afnot lands sbr. 1.gr. 

                 

5.               Leigutakar kaupa kalt vatn af félagi sem rekur vatnsveitu á svæðinu.  Þeir greiða stofnkostnað og fyrir kaup á vatninu skv. ákvörðun félagsins.

                  Leigutakar afla sjálfir rafmagns frá þeim aðila sem selur það á svæðinu og greiða allan kostnað vegna þess.

                 

6.               Umgengni og nýting lóðar skal vera snyrtileg og í samræmi við gildandi reglur.  Leigutaka er með öllu óheimilt að nýta landið til annars en að framan greinir og getur leigusali krafist þess með sérstakri áskorun til leigutaka að óheimilli notkun landsins, t.d. geymslu gamalla ökutækja eða annarra lausafjármuna, sé tafarlaust hætt að viðlagðri riftun leigusamnings.  Sama gildir ef notkun leigutaka á hinu leigða landi hefur í för með sér óþrifnað og er til óþæginda fyrir aðra leigutaka á svæðinu.

                 

7.               Leigutaki greiði alla skatta og gjöld af hinni leigðu lóð og halda uppi lögskilum     af henni frá undirritun  þessa leigusamnings.  Sama gildir um skatta og gjöld af

                  mannvirkjum á lóðinni.

8.               Leigutaki skuldbindur sig til að fara að fyrirmælum skipulags- og heilbrigðis-yfirvalda að öllu leyti hvað varðar frágang á skolp- og frárennsli.

9.               Leigutaki má veðsetja eign sína,  þ.e. hús eða önnur mannvirki á lóðinni með tilheyrandi lóðarréttindum.  Framsal á réttindum skv. samningi þessum er heimilt en þó getur leigusali hafnað framsali ef lóðarleiga er í vanskilum.  Framsal skal því ávallt áritað um samþykki leigusala og gildir þá um leið sem tilkynning til hans um framsalið.  Komi til sölu á réttindum leigutaka á leigusali forkaupsrétt á eignum leigutaka á lóðinni. Leigutakar eiga forkaupsrétt að lóðinni verði hún seld.  Um forkaupsréttinn gilda almennar reglur þar um á hverjum tíma.

10.             Leigutaka er skylt að vera í félagi orlofshúsaeigenda á svæðinu, en félaginu er ætlað að koma fram sem almennur málsvari  allra leigutaka á svæðinu gagnvart leigusala og taka að sér sameiginleg mál leigutaka eftir því sem nánar er ákveðið í samþykktum félagsins. Félagið annast m.a. viðhald girðinga og vega á sumarhúsasvæðinu.  Skal leigutaka skylt að hlíta löglega teknum ákvörðunum félagsfunda.

11.             Verði verulegar vanefndir á samningi þessum fer um riftun skv. lögum.

12.             Samningur þessi heldur gildi sínu þótt eigendaskipti verði að jörðinni Grímsstöðum, Borgarbyggð.

                 

13.             Rísi mál út af leigusamningi þessum skal það rekið fyrir Héraðsdómi

                  Vesturlands.

14.             Samningur þessi er gerður í þremur samhljóða eintökum, eitt handa hvorum aðila og eitt til þinglýsingar.   

15.             Leigutakar greiða þinglýsingar- og stimpilgjöld vegna samnings þessa.

Öllu framangreindu til staðfestu, rita aðilar nöfn sín í viðurvist votta.

   

Grímsstöðum,         /        2014.

                 

Leigusali:                                                             Leigutakar:                                                   

__________________________                          _______________________________

Guðni Haraldsson

                                                                              _______________________________

Vottar að fjárræði, réttri dagsetningu og undirritun aðila:

_______________________________________kt.___________________

_______________________________________kt.___________________