Vatnið í Múlabyggð

Vatnið í Múlabyggð er ekki drykkjarhæft

Stjórn félagsins vill minna á að vatnið í Múlabyggð telst ekki neysluhæft fyrr en mengunarmælingar hafa staðfest að svo sé. Þrátt fyrir endurbætur á eystra vatnsbólinu sl.haust mældist enn mengun í því nú í vor. Engin ástæða er til að treysta vestara vatnsbólinu betur. Þeir sem dvelja í Múlabyggð eru því eindregið varaðir við að drekka kranavatnið.

Fullur þrýstingur kominn á vatnið á vestara svæðinu

Framkvæmdir á vestursvæðinu hafa gengið vel og í gærkvöldi var hleypt vatni á tankana. Þeir voru orðnir fullir um hádegi í dag (6000 lítrar alls). Talsvert af lofti komst í lögnina við framkvæmdirnar, en vegna góðs þrýstings og lagfæringa á lofttappa rétt við tankana gekk vandræðalaust að losna við loftið. Nú er góður vatnsþrýstingur á vestara svæðinu. Vel að verki staðið Haraldur og félagar.

Hér eru nokkrar myndir frá framkvæmdunum:

Svona litu framkvæmdirnar út frá vegi 535. 

Byrjað var á að skipta um jarðveg og aðra tunnuna í vatnsbólinu.

Hér sjást bæði vatnsbólin á vestara svæðinu. Eftir er að hækka stútinn á því nýja og tyrfa yfir.

Nýi 4000L tankurinn kominn niður í stað þess eldgamla 1000L sem sést á kerru í baksýn. 2000L tankurinn hægra megin er enn í notkun (hliðtengdur) og kallast nú gamli tankur. Lækka þurfti lagnirnar undir veginum því þær lágu upp á við og mynduðu lofttappa sem nú er horfinn.

Hér er búið að tengja nýja tankinn við þann gamla og allar stofnæðar. Ofan við tankinn sést í lögnina frá vatnsbólinu, sem var tengd stuttu síðar og vatni hleypt á kerfið.

Næsta skref er að setja aftöppunarkrana á millitengið, setja kistu utanum kranana, moka svo að nýja tankinum, ganga betur frá yfirfalli og sá í sárin. Einnig þarf að hækka stútinn á nýja vatnsbólinu og tyrfa þar yfir. Í framhaldinu er ætlunin að bæta við þriðja vatnsbólinu um 50m vestar og tengja það inn á gamla tankinn.

Lokað fyrir vatnið vestan megin 16. júní 2015

Nú er það staðfest að vatnið verður tekið af vestursvæðinu kl.8:30 á morgun þriðjudag. Í fyrsta lagi annað kvöld byrjar aftur að renna í vatnsbólið og það tekur hálfan sólarhring að fyllast.

Lokað fyrir vatnið vestan megin vegna framkvæmda

Ágætu félagsmenn, á aðalfundinum í lok maí kom m.a. fram að ráðast þarf í framkvæmdir við vestari vatnsveituna, sem valda tímabundnu vatnsleysi á vestara svæðinu. Nú eru þessar framkvæmdir að hefjast og gert er ráð fyrir að lokað verði fyrir vatnið þriðjudaginn 16. júní og etv. lengur. Ath. að þetta gildir bara um vestara svæðið, eystra svæðið verður ekki fyrir neinum áhrifum. Þessi dagsetning er ekki endanlega staðfest og óvíst er með framvindu verksins, svo vinsamlegst fylgist með á vefnum mulabyggd.blogspot.com og/eða Facebook síðu félagsins til að fá nánari upplýsingar um lokanir.

Með kveðju,
stjórnin

Stjórn félagsins 2015-2016

Þorvarður Kári Ólafsson, formaður (nr.19)

Fanný Miiller Jóhannsdóttir, gjaldkeri (nr.4)
Guðrún Svanborg Hauksdóttir, ritari (nr.36)

Aldís Norðfjörð (nr.30) 
Sigurður Einar Lyngdal (nr.7)

Varamenn: Haraldur Jónsson (nr.13) og Hildur Ingvarsdóttir (nr.33,34).

Kosin á aðalfundi félagsins 26. maí 2015.

Netfang stjórnar er mulabyggd@gmail.com

Fundarboð - Aðalfundur Félags bústaðaeigenda í Múlabyggð 26. maí 2015

Aðalfundur Félags sumarhúsaeigenda í Múlabyggð verður haldinn þriðjudaginn 26. maí næstkomandi, kl 20.00.

Fundarstaðurinn er að Stórhöfða 31, sal Rafiðnaðarsambandsins (gengið inn að neðanverðu við húsið)
Fundurinn hefst á fræðsluerindi um brunavarnir, flutt af sérfræðingi frá Eflu verkfræðistofu.

Að því loknu tekur við dagskrá skv. lögum félagsins:

1. Skýrsla stjórnar um starfsemi félagsins. Svo og um vatnsveituna
2. Staðfestur ársreikningur félagsins fyrir liðið reikningsár lagður fram til umræðu og samþykktar. Nær einnig yfir vatnsveitudeild, en rekstur hennar er sýndur sérstaklega í reikningunum
3. Kosning formanns í samræmi við 6. gr.,
4. Kosning annarra stjórnarmanna í samræmi við 6. gr.,
5. Kosning varamanns/manna í samræmi við 6. gr.,
6. Kosning skoðunarmanns/manna ársreikninga og varamanns,
7. Framlagning rekstrar- og framkvæmdaáætlunar fyrir næsta ár. Svo og fyrir vatnsveituna
8. Ákvörðun um árgjald félagsins sem standa skal undir eðlilegu viðhaldi og rekstri skv. 15. gr. Svo og vatnsveitugjalds skv.samþykktum vatnsveitudeildar
9. Mál sem tiltekin eru í fundarboði og afgreiðsla þeirra. Að þessu sinni engin
10. Önnur mál. Lóðarleigusamningar

Vinsamlegast athugið að fundurinn er jafnframt aðalfundur vatnveitudeildar félagsins. Málefni vatnsveitudeildar verða tekin fyrir undir viðeigandi liðum á dagskránni í samræmi við samþykktir deildarinnar.

Nánar á vef félagsins http://mulabyggd.blogspot.com

Fyrir hönd stjórnar,
Þorvarður Kári Ólafsson formaður

Um lóðarleigusamninga og landamerkjayfirlýsingu

Landeigandi hefur dregið að endurnýja lóðarleigusamninga á þeim forsendum að þeir þurfi að innihalda hnit lóðamarka, sem hann segist vera að afla. Liðnir eru 5 mánuðir frá því hann undirritaði skuldbindingu um að endurnýja alla lóðarleigusamninga á þessu ári, en ekkert bólar á umræddum hnitum, hvað þá samningunum sjálfum.

Nú er komið nýtt ferli um skráningu eignamarka með þinglýstri landamerkjayfirlýsingu fyrir hvert hverfi, sem gerir óþarft að tilgreina hnit í lóðarleigusamningum. Ekkert er því til fyrirstöðu að ganga frá lóðarleigusamningunum óháð landamerkjayfirlýsingu. Því hefur formaður skorað á landeiganda að hraða frágangi lóðarleigusamninga í samræmi við skuldbindingu, og boðið fram aðstoð við það, t.d. með því að afla undirritana félagsmanna.

Bréf sent landeiganda 2. október 2014:
Sæll Guðni, þú getur lesið um nýtt ferli fyrir staðfestingu eignamarka á þessari síðu: http://www.skra.is/fasteignaskra/skraning-landeigna/uppmaeling-landamerkja-og-stadfesting-eignamarka/ 
Eins og ég sagði í símann mæli ég með að þú leitir nánari leiðbeininga um frágang landamerkjayfirlýsingar hjá byggingarfulltrúa Borgarbyggðar. Ég er tilbúinn til að aðstoða við þá vinnu, sérstaklega með því að kynna félagsmönnum málið og afla undirritana þeirra á landamerkjayfirlýsinguna þegar þar að kemur, sem ég tel raunhæft með vorinu.
En hins vegar liggur mun meira á lóðarleigusamningunum. Eins og ég sagði þér í símann þá er óþarfi og í raun tvíverknaður að tilgreina hnit í lóðarleigusamningum, að ekki sé talað um hættuna á villum og ósamræmi. Eðlilegast er að lóðarleigusamningar vísi í gildandi deiliskipulag og þinglýst eignarmörk á hverjum tíma. Því er ekkert því til fyrirstöðu að endurnýja lóðarleigusamningana strax, óháð fyrrgreindri vinnu við landamerkjayfirlýsingu, enda vorum við vorum búnir að ná samkomulagi um texta samninganna þegar í vor.
Það er orðið mjög brýnt að endurnýja lóðarleigusamningana og því skora ég á þig að hraða frágangi þeirra í samræmi við skuldbindingu þína í samkomulagi frá í vor. Sem formaður félagsins býðst ég til að aðstoða við þá vinnu, t.d. með því að afla undirritana félagsmanna á samningana.
Með kveðju, Þorvarður

Framkvæmdir í september 2014

Austara vatnsbólið

Lokið er framkvæmdum samkvæmt myndum 2 og 3 í minnisblaði sérfræðings, tyrfa og girða umhverfis inntakstunnur og sá í öll sár.

 

Vestara vatnsbólið

Hluta af því sem lagt var til á myndum 5 og 6 í minnisblaði sérfræðings er lokið. Búið er að hylja báða tankana, grafa rás frá neðri inntakstunnu og taka tvær prufuholur við skriður í nágrenninu. Í ljós kom að neðri inntakstunnan er stífluð og eftir er að hreinsa mold frá henni og setja grús, um leið og hún verður hækkuð. Fylgst verður með prufuholunum í vetur.

  

Stjórnin

Minnisblað sérfræðings um vatnsbólin í Múlabyggð

Minnispunktar og myndir teknar saman af Þórólfi Hafstað og Hildi Ingvarsdóttur 26.8.2014

Minnismiðinn er settur saman í framhaldi af vettvangsferð í blíðviðri þann 22. ágúst 2014.  Á vatns­veitinni eru um 40 bústaðir. Vatn er fengið úr tveimur bólum og er dreifikerfið tvískipt. Því hefur lýst í samantekt stjórnar Félags bústaðaeigenda í Múlabyggð frá 5. febrúar 2014 „Staða vatnsveitu­mála í Múlabyggð“ og er alfarið vísað til hennar um staðhætti, rennslismælingar sem og almennt ástand veitunnar. Mynd 1 sýnir einungis yfirlit um afstöðu bóla og bústaða.

Mynd 1. Myndin sýnir þá bústaði eða lóðir, sem upp koma á vef Þjóðskrár Íslands (skra.is) eftir leitarorðinu“Múlabyggð“. Inn á myndina er laumað nokkurn veginn staðsetningu á vatnsbólunum.

Austara vatnsbólið

Mynd 2. Myndin á að sýna hvað gera þarf á yfirborði við austara vatnsbólið.

Mynd 3. Myndin sýnir nánar aðstæður í efra vatnsbólinu. Helstu viðgerðarþættir eru tilgreindir. Vakin er athygli á að verulegt vatnsmagn geymist í púkkinu kring um brunnana, sem er í lokuðu þrýstisambandi við miðlunartankinn þarna ögn neðar. Þegar púkkið tekur ekki lengur við rennur lækur frá svæðinu; nú ½ l/s.

Mynd 4. Myndin sýnir yfirlit um svolítið lindarrennsli austan við vatnsbólin (sjá „smá“ á mynd 1).

Vestara vatnsbólið

Mynd 5. Myndin sýnir toppa á tveimur samtengdum miðlunartönkum og yfirlit um hvað þarf að gera þar.

Mynd 6. Myndin sýnir afstöðu nýja tanksins á vestara svæði til svolítils lindarrennslis í grenndinni. Þarna er ekki mikils vatns von en ef eitthvað vatn fengist er þaðan sjálfrennandi að vestari veitunni.

Mynd 7. Myndin sýnir innrennsli í (gamla tankinn) á vesta vatnsbólssvæðinu föstudaginn 22. ágúst. Þetta er nú ekki merkileg buna og viðbúið að það verður að fá þarna meira vatn til að tryggt sé að þessi partur veitunnar verði ekki vatnslaus í þurrkatíð á sumrum eða þá eftir vetrarhörkur. Samt var ekki þurrkasumar!

Mynd 8. Myndin sýnir yfirlit um svolítið lindarrennsli vestan við vatnsbólin (sjá „smá“ á mynd 1).

Spottakorn vestan við vestara vatnsbólssvæðið er lindarvætla (mynd 8), sem er hartnær sambærileg og sýnd er á mynd  4. Þessari ´ærmigu´ verður ekki veitt sjálfrennandi í tank en stutt er frá henni er einn af vestustu bústöðunum og þangað mætti veita þessum smáleka inn á kerfið og dæla inná ef eitthvað er hér stöðugt rennsli.

Mælt er með að næstu aðgerðir verði gerðar í þrepum og þeim með svofelldum hætti:

1.      Bæta úr gerlamengunarhættu. Þær aðgerðir, sem hér hefur verið imprað á myndum, beinast að því að bæta vatnsgæðin en minna til að auka rennslið.

2.      Taka þarf afstöðu til næstu aðgerða til að auka fáanlegt vatn. Eftir að umbætur hafa verið gerðar til að tryggja heilnæmt vatn á austara svæði er inni í myndinni að tengja umfram­rennsli þaðan yfir á vestari veituna. Þarna var umframvatn að fá þegar skoðað var. Ekki er visst um sjálfrennsli þarna í milli en það talið líklegt.

3.      Þegar og ef enn meira vatns er þörf í þessari frístundabyggð er rétt að huga að róttækum breytingum á neysluvatnsöflun. Hingað til er vatnstaka einungis miðuð við misvel vatns­gefandi smálindir og sjálfrennsli frá þeim en kröfur bústaðaeigenda eru að geta alltaf gengið að rennandi gæðaneysluvatni.

4.      Virkja smálindir sitt hvoru megin núverandi vatnsbóla, leiða vatn að næsta bústað og dæla svolitlu vatni inn á dreifikerfin þegar á þarf að halda (þá samtengd til að nýta allt vatnið).

5.      Mögulegt er að gera sæmileg vatnsból í brunnum, sem grafa má í ármöl við bakka Stekksár og Urriðaár en, austan og vestan Múlabyggðar.  Báðar þessar ár eru í raun aumingjalegir og e.t.v. hverfulir lækir. Samt er við þá grunnvatnsvon en aðeins úr gröfnum dælubrunnum.

Framtíðarmúsíkin (sbr. lið 5)

Frekari möguleikar liggja fyrst og fremst í eyrum ánna tveggja; Stekksár og Urriðaár:

Mynd 9. Myndin sýnir afar grófan farveg Stekksár. Meðfram henni rennur grunnvatn í malareyrinni.

Mynd 10. Urriðaármölin er á köflum alls ekki ekki fínni og fallegri en Stekksármölin Víða er grunnt niður á fasta klöpp og þess vegna ekki alltaf á vísan að róa til að fá góðan filter fyrir neysluvatn.

Möguleg borun?  Á þessu svæði er talin vera lítil von til að borun í fast berg beri árangur. Ekki er hægt að búast við nema kannski hálfum sekúndulítra úr  100 metra djúpri holu. Kostnaður vegna borunar er sjálfsagt ekki undir 2 milljónum (bora og virkja). Slík hola getur hentað 2-3 bústöðum

Stjórn félagsins 2014-2015

Þorvarður Kári Ólafsson, formaður (nr.19)

Fanný Miiller Jóhannsdóttir, gjaldkeri (nr.4)
Guðrún Svanborg Hauksdóttir, ritari (nr.36)

Pétur Kristinsson (nr.17,18,20) 
Sigmundur Andrésson (nr.24)

Varamenn: Haraldur Jónsson (nr.13) og Hildur Ingvarsdóttir (nr.33,34).

Kosin á aðalfundi félagsins 29. apríl 2014.

Netfang stjórnar er mulabyggd@gmail.com